القائمة الرئيسية

الصفحات

غدا مجلس النواب يصوت على قانون العفو علی الكناطرية


أفاد النائب منجی الرحوي أن مجلس نواب الشعب ينظر غدا الثلاثاء في " مشروع قانون العفو على الكناطرية ".


وتابع الرحوي في تدوينة على صفحته أن نسبة الحضور في البرلمان غدا ستكون عالية وأنهم سيتنافسون للدفاع على هذا القانون ، موضحا أن تمريره في هذا التوقيت يعود إلى مصادقة تونس على اتفاقية التبادل الآلي للمعلومات اللي باش تبدي توة حيز التنفيذ ويتكشفوا اللي عندهم أموال في الخارج ..


 " وقال الرحوي " تذكير للي حبو يعملوه في افريل وناوين يعملوه غدوة بعد فضيحة مصادقتهم على الاحتلال القطري وخيانتهم لبلادهم في وقت اللي الشعب يعاني المر من المرض والجوع والخصاصة ... 

في وقت اللي العباد قاعدة تموت قدام السبيطارات ... في وقت اللي الوباء يحصد في الأرواح وعاطي مسد ما غير حتى إجراءات جدية من حكومة الذل والإهانة باش تجابهو وتعمل اللي يلزم تعملو كل حكومة وطنية تخدم في شعبها ..........

 في وقت اللي المتقاعدين والشهارة نهار الكل يهددوا فيهم باش يوفرولهم الشهاري وإلا ما يوفروش ... في وقت اللي بو يخرج وما يعرفش كيفاه باش يرجع وبشنوة باش يدخل لصغارو وما يقدرش يوفر لهم لقمة العيش في وقت اللي الصناعي الصغير والتاجر الصغير واصحاب المؤسسات الصغرى والمتوسطة ماعادش يرقدوا ويعرفوا النوم من الشيكات الراجعة وتسكير البيبان من البنوك في وقت اللي في ها البلاد الام تعدي نهارها تلاجي وتبكي ما تلقاش دوى لصغيرها والا حليبو ...


 في الوقت هذا الكل وبعد مهازل الجمعة اللي فاتت مجلس النواب يعدي غدوة مشروع قانون العفو على الكنارية ... الكناطرية واللي هربوا فلوسهم للخارج .... غدوة تكون نسبة الحضور والتصويت عالية ويستنفروا قواهم باش يتسابقوا ويتنافسوا على شكون يدافع أكثر من غيرو على ها القانون ... 

برلمان عصابة وكمشة مجرمة لابسين رابطات عنق ومكيجين ويتكلموا بالعربية الفصحى ولابسين الزي منع التجارة بالدين ويبداوا خطاباتهم باسم الله ويزينوه بآيات قرانية ... تعرفوشي علاه باش يعديوه القانون توة ؟ على خاطر تونس صادقت على اتفاقية التبادل الآلي للمعلومات اللي باش تبدي توة حيز التنفيذ ويتكشفوا اللي عندهم اموال في الخارج ......... 

حالا عندهم برلمان يخدملهم الخدمة يعمللهم قانون عفو قبل ما يتكشفوا ويتعاقبوا يعمللهم عفو ويمنعهم ويضرب الباكو علاه لا ... فهمتوشي هالحكومة حكومة شكون وها البرلمان برلمان شكون ... حل البرلمان واجب " وفق تعبيره .